Да Міжнароднага дня салідарнасці жанчын

Пра гісторыю вядомага ўсім свята 8 сакавіка, на самой справе Дня барацьбы жанчын за свае правы, распавяла Тамара Сцяпанава, навукоўца і даўняя прыхільніца Беларускай сацыял-дэмакратычнай партыі. Рабочая група “Жанчыны БСДП” знайшла ўтульны асяродак для сустрэчы і творчай дыскусіі актывістак партыі і зацікаўленых сяброў. Мы былі ўдзячныя Аляксандры Лісоўскай за агляд відаў дзяржаўнай дапамогі сем’ям, якія выхоўваюць дзяцей. Цяпер нараджаецца больш дзетак, ды не ўсе з іх маюць добрае здароўе. Як жыць лепей?

На семінары мы разглядалі шырокае кола пытанняў: ад няпростых сямейных да грамадска-палітычных. Гэта фарміраванне жаночага руху, патрабаванні жанчын на працягу часу, стварэнне арганізацый, ініцыятыў, характарыстыкі жаночага лідэрства і прыклады поспеху жанчын у палітыцы і грамадскай дзейнасці.

Што можа зрабіць жанчына, каб палепшыць сваё жыццё? Мала таго: атрымаць кветкі, наведаць цырульню, зварыць нешта смачнае. Яна сказала бы пра свае жаданні, а хто іх пачуе… Салідарныя жанчыны хочуць атрымаць справядлівую ацэнку сваёй працы, як дома, так і ў грамадстве, з пазіцыі не сілы, а розуму. Генератары ідэй у Беларусі былі і ёсць, імёны іх даволі вядомыя. Яны павінны стаць на роўных правах лідэрамі нацыі.