“Жанчыны БСДП” правяли сустрэчу ў Бабруйску (фота)

11 красавіка прадстаўніцы Беларускай сацыял-дэмакратычнай партыі (Грамады) наведалі Бабруйск. На сустрэчу з мясцовымі актывісткамі жаночага руху прыехалі Жанна Семянтовіч – каардынатарка Жаночай ініцыятывы, Алена Лінкевіч – каардынатарка рабочай групы “Жанчыны БСДП” у Гомельскай вобласці, Маргарыта Красікава – адказная за працу з рэгіёнамі ў МСД-МГ і Любоў Шомчанка – грамадская актывістка, незалежны юрыст з Мінску. На сустрэчы прысутнічала і журналістка мясцовай газеты “Бабруйскі кур’ер” Марына Міхневіч. Расказвае Жанна Семянтовіч, каардынатарка Жаночай ініцыятывы БСДП:

“Два тыдні таму я пазнаёмілася з жанчынай, якая была вельмі зацікаўлена беларускімі жанчынамі ў палітыцы. Завуць яе Наталля С. і жыве яна ў Бабруйску. Наталлі апошнім часам давялося шмат кантактаваць з маладымі жанчынамі, якія так ці інакш цікавіліся палітыкай. У выніку яна вырашыла даведацца пра жаночы рух у рэспубліцы і выказала жаданне далучыцца да сумеснай дзейнасці.

Наталля арганізавала сустрэчу актывістак БСДП з жанчынамі ў Бабруйску, пад час якой мы распавялі пра нашу працу: удзел у выбарчых кампаніях, падрыхтоўка выбарчых кампаній, правядзенне акцыяў і пікетаў, удзел у грамадска-палітычных праграмах, інфармацыйныя кампаніі. Удзельніцам сустрэчы мы прэзэнтавалі наш часопіс “Адлюстраванне”, паштоўкі, брашуры “Сацыял-дэмакратыя і дыктатура”, апошнія нумары бюлетэня “Сацыял-Дэмакрат”. Алена Лінкевіч прывезла мясцовую незалежную газету “Рэчыцкі агляд”, а Любоў Шомчанка для ўсіх удзельніц сустрэчы прачытала свае вершы-“шомікі”.
Усе жанчыны выказаліся абедзвюма рукамі за сумесныя справы, за супрацоўніцтва.

Мы спадзяемся, што наступным крокам будзе распрацоўка нашага агульнага плана работы і яго ажыццяўленне.”

Сваімі ўражаннямі ад сустрэчы таксама падзялілася Алена Лінкевіч, каардынатарка рабочай групы “Жанчыны БСДП” у Гомельскай вобласці: “Вельмі прыемна, што пра Жаночую ініцыятыву БСДП ведаюць незаангажаваныя ў палітыцы людзі. Мы ладзім шмат акцый і мерапрыемстваў для жанчын і дзяцей. Лічым, што такім чынам мы аб’ядноўваемся і прыцягваем на свой бок мужчын, робім іх сваімі саюзнікамі.”

Маргарыта Красікава распавяла пра разнастайную работу з маладымі сацыял-дэмакратамі: адукацыйныя семінары і трэнінгі, летнікі, рознабаковая інфармацыйнай дзейнасць. “На мой погляд, трэба больш працаваць з моладдзю, распаўсюджваць веды, распавядаць пра свой вопыт грамадскай дзейнасці. Да нашай сумеснай дзейнасці мы абавязкова будзем далучаць маладых і актыўных дзяўчат з Бабруйска”.

Усе ўдзельніцы звярнулі ўвагу на тое, што галоўнай мэтай гендэрнай палітыкі ў Беларусі павінна быць усталяванне роўных правоў мужчын і жанчын, барацьба са стэрэатыпамі і забеспячэнне прававой абароны жанчын.

А самая галоўная думка, якая гучала пад час сустрэчы, - гэта аб’яднанне жаночых рухаў і сумесная праца. Бо разам мы будзем вельмі дужымі!..

Прэс-група БСДП