А. Абрамовіч патрабуе прыцягнуць да крымінальнай адказнасьці кіраўніка радыёстанцыі " Минская Волна"

Фота ілюстрацыйнае

СТАРШЫНЯ МІНСКАЙ АБЛАСНОЙ АРГАНІЗАЦЫІ БЕЛАРУСКАЙ САЦЫЯЛ-ДЭМАКРАТЫЧНАЙ ПАРТЫІ (ГРАМАДЫ) АЛЕСЬ АБРАМОВІЧ
ЗВЯРНУЎСЯ Ў ПРАКУРАТУРУ З ПАТРАБАВАННЕМ ПРЫЦЯГНУЦЬ ДА КРЫМІНАЛЬНАЙ АДКАЗНАСЦІ ДЫРЭКТАРА ДЗЯРЖРАДЫЁСТАНЦЫІ
"МИНСКАЯ ВОЛНА" ТАМАРУ ВЯТСКУЮ.

Яна здзейсніла цэнзуры яго перадвыбарчага выступа як кандыдата ў дэпутаты Мінаблсавета па Барысаўскай цэнтральнай акрузе №28 31 студзеня бягучага года. Спадарыня Вятская выдаліла разам з вядучым юрысконсультам "МВ" Таццянай Кірыенка, як назвалася гэтая другая жанчына, наступнае цытуемае месца "так і па аднаўленні парадка на Міншчыне, у прыватнасці, шляхам уважлівага азнаямлення з Заключэннем Спецыяльнай камісіі Вярхоўнага Савета РБ 13-га склікання па прававой ацэнцы дзеянняў прэзідэнта Беларусі Аляксандра Лукашэнкі" з наступнага абзаца выступа барысаўскага сацыял-дэмакрата:

"Назапашаныя ў эміграцыі вопыт і магчымасць працяглага назірання за рэчаіснасцю перадавых краін свету яшчэ больш пераканалі мяне ў правільнасці прынцыповай пазіцыі Беларускай сацыял-дэмакратычнай партыі (Грамады) па аднаўленню канстытуцыйнасці і законнасці на Беларусі і развіццю рынкавай эканомікі. Таму я падтрымліваю, напрыклад, ініцыятывы вядомага барысаўскага праваабаронцы і бізнесоўцы Ігара Ледніка як па прыцягненню буйных інвестыцыяў ад добрасумленных інвестараў у эканоміку Барысава і ўсёй вобласці шляхам стварэння адмысловай фінансава-прамысловай групы, так і па аднаўленні парадка на Міншчыне, у прыватнасці, шляхам уважлівага азнаямлення з Заключэннем Спецыяльнай камісіі Вярхоўнага Савета РБ 13-га склікання па прававой ацэнцы дзеянняў прэзідэнта Беларусі Аляксандра Лукашэнкі".

Алесь Абрамовіч лічыць, што супрацьпраўныя дзеянні Тамары Вятскай і Таццяны Кірыенкі шляхам папярэдняй дамоўленасці ў складзе групы з выкарыстаннем службовага становішча не толькі парушаюць артыкул 33 Канстытуцыі Беларусі, які гарантуе кожнаму свабоду думак і іх свабоднае выказванне, а таксама забараняе цэнзуру, але і цягнуць за сабой крымінальную адказнсць паводле часткі 2 артыкула 191 Крымінальнага Кодэкса РБ "Перашкоды ў здзяйсненні выбарчых правоў, права на ўдзел у рэферэндуме, альбо рэалізацыі права заканадаўчай ініцыятывы грамадзян, альбо працы Цэнтральнай выбарчай камісіі Рэспублікі Беларусь, выбарчых камісіяў, камісіяў па рэферэндуму, камісіяў па правядзенню галасавання па адкліканні дэпутата". Санкцыі па ч. 2 арт. 191 КК РБ прадугледжваюць абмежаванне свабоды на тэрмін ад двух да пяці гадоў ці турэмнае зняволенне тэрмінам да пяці гадоў.

Дарэчы, Спецыяльную камісію Вярхоўнага Савета РБ 13-га склікання па прававой ацэнцы дзеянняў прэзідэнта Беларусі Аляксандра Лукашэнкі, згадку аб якой выдалілі Тамара Вятская і Таццяна Кірэенка, ўзначальваў у свой час зніклы палітык Віктар Ганчар. Пасля выдалення гэтай згадкі рэальная даўжыня выступа Абрамовіча на радыё "МВ" склала 2 хвіліны 45 секунд, хаця ён распісаўся ў адмысловым дакуменце радыёстанцыі за хронаметраж у 2 хвіліны 57 секунд. Такім чынам, выдаленая згадка аб Спецкамісіі ВС РБ 13-га склікання склала па часе 12 секунд. Цэнзураваны Вятскай і Кірыенка аўдыёфайл запісаны аўтарам гэтых радкоў падчас трансляцыі яго выступа ў запісі па радыё 31 студзеня ў 18 гадзін 12 хвілін і перададзены ў пракуратуру.