Палітыка
ПЕРШЫ ТУР МЯСЦОВЫХ ВЫБАРАЎ У ПОЛЬШЧЫ
панядзелак, 22 Кастрычнік 2018 14:05
Aўтар:
Учора ў Польшчы прайшоў першы тур мясцовых выбараў. Выбіралі войтаў гмін,
бурмістраў і прэзідэнтаў гарадоў, дэпутатаў у гмінныя і павятовыя рады, ваяводскія
соймікі, а таксама ў раённыя рады ў Варшаве.
У галасаванні ўзялі ўдзел больш за 51 працэнт выбаршчыкаў. Сваіх кандыдатаў
вылучалі 10 партый і блокаў.
На левым флангу выступаў Саюз левых дэмакратаў у блоку з Уніяй працы, Польскай
сацыял-дэмакратыяй, Польскай сацыялістычнай партыяй, Польскай лявіцай і Рухам
гаспадарчага адраджэння імя Эдварда Герэка. Як і на парламенцкіх выбарах у 2015 годзе,
асобна ішла партыя Разам.
Шанцы левых на гэтых выбарах ацэньваліся вельмі нізка. Вынікі галасавання
пацвердзілі прагнозы. Партыя Разам, паводле папярэдніх вынікаў, набрала 1,4 працэнта
галасоў (у 2015 годзе яна мела падтрымку 3,6 адсотка выбаршчыкаў). Левы блок
пераадолеў выбарчы парог (5,7 працэнта галасоў), але яго лідэры перад другім турам
выбараў не перапоўненыя аптымізмам.
Невысока ацэньваліся перспектывы самай старой палітычнай арганізацыі – Польскай
сялянскай партыі, аднак нечакана для многіх яна набрала каля 17 працэнтаў галасоў.
Асноўнымі ж гульцамі былі сёлета ўрадавая партыя Права і Справядлівасць (ПіС), якая
мае абсалютную большасць у польскім парламенце, і Грамадзянская кааліцыя, у якую
ўвайшлі дзве партыі – ліберальная Грамадзянская платформа (кіравала Польшчай да 2015
года) і таксама ліберальная, але бліжэйшая да цэнтру Сучасная, якая з’явілася на
палітычнай арэне перад выбарамі 2015 года ў Сойм і ўвайшла ў парламент.
Назіральнікі сцвярджаюць: ПІС небезумоўна выйграла ў ваяводствах, але прайграла ў
гарадах, асабліва буйных.
Паводле папярэдніх вынікаў, ПіС дасягнула поспеху на выбарах у соймікі ў 9
ваяводствах – Лодзкім, Люблінскім, Мазавецкім, Малапольскім, Ніжнесілезскім,
Падкарпацкім, Падляшскім, Свенткрыжскім і Сілезскім, але ў некаторых ваяводскіх
сойміках ёй давядзецца шукаць саюзнікаў. Між тым лідэр Польскай сялянскай партыі
Уладзіслаў Касіняк-Камыш ужо заявіў, што яго партыя не будзе ствараць кааліцыі з
Правам і Справядлівасцю.
Пагатоў не з’яўляецца саюзнікам ПіС Грамадзянская кааліцыя, якая паспяхова
выступіла ў астатніх сямі ваяводствах -- Апольскім, Вармінска-Мазурскім,
Вялікапольскім, Заходнепаморскім, Куяўска-Паморскім, Любускім і Паморскім.
Грамадзянская кааліцыя паспяхова правяла выбарчую кампанію ў Варшаве, Беластоку,
Лодзі, Любліне і Познані. Яе прадстаўнікі сталі прэзідэнтамі гэтых гарадоў. Прадстаўнік
кааліцыі выйшаў у другі тур на выбарах прэзідэнта Гданьска.
Пры выбарах у мясцовыя органы ўлады ў Польшчы дзейнічае мажарытарная сістэма:
абраным лічыцца кандыдат, які набраў больш за 50 адсоткаў галасоў. Пры гэтым
назіральнікі і палітолагі сочаць за партыйнымі рэйтынгамі. Вынікі першага тура мясцовых
выбараў у Польшчы паказваюць: хоць Права і Справядлівасць і дасягнула поспеху (32,3
працэнта), пазіцыі гэтай партыі значна слабейшыя, чым у 2015 годзе.
Другі тур выбараў адбудзецца 4 лістапада.
Анатоль Сідарэвіч
Ігар Барысаў
Андрэй Казановіч
Ігар Маслоўскі
Ганна Канюс
Анатоль Cідарэвіч
Cяргей Адамовіч
№15
№14
№13
