Хто мы?

Мы – Беларуская сацыял-дэмакратычная партыя (Грамада) – партыя справядлівасці і раўнапраўя.

Мы верым, што кожны беларус мае права на годны ўзровень жыцця і вялікія эканамічныя магчымасці. Дасягнуць таго ўзроўню, якога мы заслугоўваем, можна толькі праз справядлівасць і раўнапраўе для ўсіх: жанчын і мужчын, маладых і пажылых, працадаўцаў і людзей наёмнай працы, чыноўнікаў і простых грамадзян.

Беларусы маюць усё менш справядлівасці, усё горшыя стандарты ў сферы жыллёвай гаспадаркі, аховы здароўя і адукацыі. Мы бачым усё больш і больш непавагі працадаўцаў да наёмных работнікаў, чыноўнікаў – да простых грамадзян.

Улада і тыя, хто пры падтрымцы ўлады стаў багатым, вышэй за ўсё ставяць свае інтарэсы, адкідваюць прынцыпы справядлівасці, роўнасці і салідарнасці.

Мы, сацыял-дэмакраты, выступаем за Беларусь, у якой кожнаму будзе забяспечана павага да яго чалавечай годнасці, высокі жыццёвы ўзровень, ахова здароўя і адукацыя. Мы выступаем за справядлівую Беларусь, у якой складуцца раўнапраўныя і справядлівыя адносіны паміж жанчынамі і мужчынамі, маладымі і пажылымі, працадаўцамі і людзьмі наёмнай працы, чыноўнікамі і простымі грамадзянамі.

Далучайцеся да нас у барацьбе за лепшую Беларусь!